Davao City – Gipaniguro sa Task Force Davao nga luwas sugaton ug i-selebrar sa mga Dabawenyo ang kapaskohan ug bag-ong tuig sunod semana.
Kini ang gipasalig ni Task Force Davao Commander Col. Nolasco Mempin nga luwas saulogon sa mga Dabawenyo ang Pasko sunod semana luyo sa hulgang atake sa CPP-NPA-NDFP sa tibuok nasud.
Matud ni Mempin nga nagpabiling alerto ang Task Force Davao sukad sa nakalabay’ng mga aktibidad sa siyudad ug gani 24/7 sab nagpatrolya sa dakbayan ang iyang mga ginsakpan.
Segun ni Mempin nga kabahin sa ilang gipalig-ong seguridad mao ang istrikto nga checkpoints sa tulo ka dapit sa siyudad ug mobile ug foot patrol sa mga nag-unang lugar sa dakbayan.
Subay ani, walay gitugotan ang opisyal sa iyang mga ginsakpan nga maka-leave aron masiguro ang igong puwersa sa pagbantay sa seguridad sa dakbayan atol sa selebrasyon sa Pasko ug Bag-ong Tuig.
Apelar lamang ni Mempin sa publiko mao nga magpakabana sa palibot ug gilayon mutaho ngadto kanila o dili ba kaha sa kapulisan aron dili makalusot ang mga dautang elemento dinhi sa siyudad.
RadyoMaN Joel Viray
