Davao City – Gitataw karon sa 10th Infantry Division Philippine Army nga walay angay kahadlokan ang publiko sa gideklara nga Threat Level 3 sa tibuok Rehiyon Onse.
Wala matud pa nagpasabot kay gipailawom sa Threat Level 3 ang kinatibuk-ang rehiyon taas na ang hulga sa terorismo ni adunay nakasulod nga mga terorista aron mamomba sa bisan asang lugar sa atong dapit.
Gipasabot ni 10th ID spokesperson Capt. Jerry Lamosao nga ang pag-anunsiyo sa niini sa rehiyon subay sa rekomendasyon sa National Intelligence Coordinating Council sa tumong nga mas pahugtan pa ang seguridad sa atong dapit.
Taas ang posibilidad nga tinguha sa mga terorista mamomba sa dakbayan konsiderahon nga mao kini ang hometown ni Pres. Rodrigo Duterte diin daku kining epekto sa dagan sa ekonomiya sa halapad nga bahin sa Mindanao ug sa tibuok nasud.
Busa aron mapugngan ang teroristang grupo sa ilang laraw batok sa siyudad gibutang sa third level security ang tibuok rehiyon sa katuyoan nga mag-alerto ang kapulisan ug kasundalohan ug dili mokumpiyansa aron dili malutsan sa mga dautang elemento.
Gipahibalo daan ni Lamosao ang publiko sa mas istrikto pa nga checkpoints ug inspections sa tanang mga behikulo ug sa mga tawo nga musulod-gawas sa dakbayan ug sa tibuok Davao region.
Mao na kini ang takdo nga panahon nga magkinahanglan ang kapulisan ug kasundalohan sa kooperasyon sa mga Dabawenyo sa gipatuman nga seguridad pinaagi sa pagtamod sa regulations og pagtampo ug impormasyon ugaling dunay kadudahang lihok sa palibot, segun sa tigpamaba.
RadyoMaN Joel Viray
