Gipanganti karon sa liderato sa armadong kusog sa nasud-Pilipinas nga ‘top priority’ sa ilang calibrated moves sa main battle zone sa Marawi City ang seguridad kun safety sa mga nahibiling hostages diha sa kamot sa Maute terror group.
Sa regular news conference sa Malacañang, gisugilon ni Armed Forces of the Philippines (AFP) spokesperson Brig. Gen. Restituto Padilla nga aduna pay ubayubay nga mga bihag nga pabiling anaa sa kamot sa bandidong pundok.
Dugang ni Padilla, aduna pay gibanabanaang 40 ngadto sa 50 ka mga teroristang padayong nanghasi sa maong lugar.
Ning labing ulahi, 17 ka mga bihag naluwas sa on-going military operations gilangkuban sa siyam ka mga lalaki ug walo ka mga kababayen-an.
Mokabat pa sa 200 ka mga edipisyo ang gipailawom nila sa ‘clearing operations’ gumikan sa posibleng presensya sa mga ‘unexploded ordnance and IEDs,’ segun sa tigpamaba.
Sa mga taho nga adunay grupo sa mga sundalo ug mga heneral nagkahiusa uban ang sektor sa mga kritiko sa pamunuan aron palagputon si Duterte, kampante si Padilla nga halayo kun ‘remote possibility’ ang among scenario sanglit sayud ang military and defense establishments sa nasud nga ang bisan unsang ouster move or coup d’etat dili maggikan sa ilang hut-ong.
Gi-monitor karon sa kasundaluhan sa nasud ang peace and order sa mga area sa Maguindanao, Cotabato ug Lanao ug nga kun adunay konkretong ebidensya nga sila partial kun pabor sa mga rebelde ug terorista or kadtong gikonsidera nga mga ‘enemies of the state,’ hayan ipasaka ang aksyon-legal sanglit ang pamunuan adunay katungod nga panalipdan ang iyang kaugalingon gikan sa mga destabilization moves.
RadyoMan June Duterte
