Davao City – Gisaway karon sa Armed Forces of the Philippines (AFP) ang pagpanudlo sa mga lumad schools sa mga pagtulun-ang komunismo ug pagpromotar sa kaligutgot sa tawo ngadto sa gobyerno o estado.
Sa regular nga Mindanao Hour forum, giklaro ni Armed Forces of the Philippines (AFP) spokesperson Brig. Gen. Restituto Padilla nga angay masabtan ang warning kun pasidaan ni Pres. Rodrigo Duterte atol sa iyang ikaduhang State of the Nation Address kun SONA nga apilon pag-operate ang mga lumad schools sa kabukiran nga gihimong training ground sa mga kabataan alang sa ilang adbokasiya.
“When you teach young minds about these, it is like brainwashing,” pasidaan ni Padilla.
Sa pikas bahin, ‘high morale’ karon ang kasundaluhan sa nasud-Pilipinas ilabi na ang atong mga ‘fighters and heroes’ kinsa padayun nga nakigkumbate kontra sa Maute terror group sa war zone sa Marawi.
Kapin duha na lamang ka mga barangay ug poco mas o menos usa ka square kilometer sa teritoryo ang gikinahanglang mabawi sa mga government troopers gikan sa kamot sa mga Islamist jihadists ilawom sa landong sa Maute-ISIS.
Mapasalamaton usab ang armadong kusog gumikan sa hinabang nga gitunol sa business sector sa Pilipinas alang sa mga pamilya sa mga sundalong nibuhis sa ilang kinabuhi sa panggubatan.
Niadtong nilabay’ng mga adlaw, pormal nga gitunol sa grupong ‘Go Negosyo’ ug usa ka anonymous donor ang asistinsya sa kantidad P1.25M kada sundalong nakabsan sa kinabuhi in line of duty sa nagpadayong gyera sa Marawi.
“Every soldier, every sailor, every marine would like to thank the business sector for their support,” segun sa tigpamaba sa AFP.
Gitino usab ni Padilla nga unta masabtan sa katawhan nga dili mabayran sa salapi ang kinabuhi nga nakalas atol sa anti-terrorism campaign karon sa lungsod sa Marawi.
Gipasalig usab sa kagamhanan nga gitukod ang Task Force Bangon Marawi kansang mandato mao ang paghikyad sa recovery, rehabilitation, reconstruction ug rebuilding sa battle zone.
Sa pagkakaron, mokostar na ug P200M kantidad sa mga ‘food and non-food items’ natunol ngadto sa mga bakwit kinsa padayong nag-estar karon sa nagkadiyang mga evacuation sites.
Kasamang June Duterte
