Davao City – Giklaro karon ni Task Force Davao (TF Davao) Spokesperson Lt. Col. Randolph Cabangbang nga ang operasyon sa Talomo pag-silbi lang sa orden de aresto batok sa NPA kumander nga si Kumander Jeffrey kinsa nangulo sa sparu unit ug naglungga sa abandonado nga resort diin ang mga luna palibot niini gipanag-iyahan sa kaparian.
Matud ni Cabangbang, panahon sa kadlawon dihang gisulod sa mga operatiba ang lugar busa nahitabo ang binakbakay samtang pa-ikyas ang pito ka rebelde hinoon narekober ang tag-as nga mga armas, mga bala, IED, mga subersibong dokumento, cellphone ug uban pa.
Kahinumdoman nga usa ka engkwentro niulbo tali sa kapulisan ug sa gituhuang NPA SPARU sa Talomo Cemento sa miaging adlaw diin umang kabalaka ang gibati sa mga Dabawenyo sa hisgotanang seguridad ilabi na nga mikatag sa social media nga ang gikasangka sa mga awtoridad ug kasundalohan mga sakop sa teroristang Maute group.
Gilayon ang Davao City Police Office mipagula og klaripikasyon ug gihulagway ang maong taho nga fake news ug walay kamatooran nga Maute group ang naenkwentro sa kapulisan ug kasundalohan ug bakak sab nga daghan og patay ug dunay tulo gi-hostage.
Apelar ni Cabangbang ngadto sa katawhan nga dili dayon motoo sa mukatag nga text hilabi na kung ang taho dili gikan sa lehitimo nga media outlet inay mas maayo makig-alayon sa DCPO ug sa Task Force Davao aron tinuon ang madawat nga impormasyon.
Nagtoo ang opisyal nga ang pagpakatag sa fake news buhat kadto sa tawong walay mabuhat sa kinabuhi gawas sa pagpaguliyang sa mga tawo hinoon padayon gipaningkamutan sa mga tinugyanan sa balaod nga ma-trace ug mailhan ang anaa sa likod sa pagpakuyanap sa fake news.
Gipaniguro sa tigpamaba sa Task Force Davao nga nagpabiling establisado ang hapsay ug kalinaw sa syudad ug luwas kaayo ang publiko gikan sa hulga sa terorismo busa walay angay kabalak-an ang katawhan tungod andam kanunay muresponde ang mga awtoridad panahon sa mga emerhensiya sama sa pangatake sa teroristang grupo.
RadyoMaN Joel Viray
