Nagpatuman na og Naval Blockade ang Armed Forces of the Philippines (AFP) batok sa mga kidnappers sa British National nga si Allan Hyrons ug sa asawa niini nga si Wilma Hyrons.
Sigon ni AFP Western Mindanao Command Commander Lt. Gen. Cirilito Sobejana, gikapakatag na nila ang ilang mga naval assets sa Ilyana bay, Moro gulf, Basilan strait, ug sa coastal waters dinhi sa probinsya sa Zamboanga del Sur, sa tinguha nga mababagan kung pananglitan adunay plano ang mga kidnappers nga dad-on kini sa Basilan ug Sulu.
Gawas niini, gigamit na matud pa sa AFP ang ilang mga Air assets sa pagmonitor sa kadagatan ug ang mga land assets arun sa pagsiguro sa mga coastal areas, arun dili makasibat sa layo ang mga kidnappers.
Padayun usab ang gihimong search and rescue Operations sa tibook Zamboanga Peninsula, Basilan, Lanao Del Sur, ug lakip na ang Cotabato ug Sultan Kudarat nga possibleng usa kini sa mga dapit kon diin gidala ang magtiayon.
Possible matud pa nga Abu Sayyaf ang midagit sa magtiayon gumikan kay kini lang aktibong grupo sa lugar apan gitutukan usab sa AFP ang anggulong posibleng balus kini sa mga kanhing empleyado.
