Davao City – Mi-uyon ang Armed Forces of the Philippines sa gihimong pagdeklara ni Presidente Rodrigo Duterte sa New Peoples Army (NPA) isip usa ka ‘terrorist organization.’
Sumala ni Armed Forces of the Philippines (AFP) spokesperson Maj. Gen. Restituto Padilla sa interbyu kaniya sa tulumanong ‘Straight to the Point’, makita nga gina-perwisyo na sa maong grupo ang katawhan susama sa mga nabalita nga pagsunog ug pagpangilkil sa mga sibilyan diin makonsidera isip ‘economic sabotage’ kini taliwala sa mga ginahimong programa sa gobyerno.
Giseguro ni Padilla nga padayon ang pagbantay ug pagmonitor sa militar alang sa seguridad sa katawhan.
Sa pikas bahin, gipamahayag sa tigpamaba sa AFP nga maayo ang sitwasyon sa Marawi karon samtang padayon ang ‘clearing operation’ sa 96 ka mga barangay aron paspas makabalik ang mga nanimuyo sa maong syudad.
Segun ni Padilla, 90 na ka mga barangay ang pwede nang puy-an ug tulo pa ka mga barangay ang padayong gina-clear sa mga bomba ug Improvised Explosive Devices (IEDs).
Giklaro usab ni Padilla nga i-assess una ang ‘peace and order’ sa tibuok Mindanao una pa mahuman ang tuig kung ipadayon pa sa tuig 2018 ang Martial Law sa Mindanao.
RadyoMaN Jason Amisola
