AFP ug PNP, mohimo og managlahing imbestigasyon tungod sa pagpamusil ngadto sa mga sundalo nga gikamatay sa duha, samaran ang lima

Nagpahigayon na og managlahing imbestigasyon ang Armed Forces of the Philippines ug ang Philippine National Police kabahin sa pagpamusil nga maoy hinungdan sa kamatayon sa duha ka mga sundalo ug samaran ang laing lima, buntag niadtong adlaw’ng Martes, Disyembre 24, sa Pagayawan, Lanao del Sur.

Nagpahigayon og combat clearing operation ang mga sundalo sa 55th Infantry Battalion, Philippine Army sa may Sitio Banisilan, Barangay Bandaraingud, sa lungsod sa Pagayawan dihang kalit nga namusil ang detachment commander sa CAFGU nga maoy gihimong guide sa operasyon.

PAtay on-the-spot sila si 2Lt. Mark Linne Banua ug Sgt. Jhanjihan Carumba samtang samaran sila si TSgt. Randy Esmade, PFC Nilo Rubiato, Pvt Roger Amihan, Pvt Jovanie Calaguian ug Pvt Therenz John Francisco.


Ang suspek, nailang si Corporal Nao Mohammad Lassam, misibat ngadto sa wala matinong direksiyon human sa iyang pagpamusil.

Ang lugar kung asa nahitabo ang kremin mao ang susamang dapit kung asa gi-ambush-patay niadtong Lunes, Disyembre 23, ang officer-in-charge sa Binidayan Municipal Police Station nga si Executive Master Sergeant Amen Macalangan ug ang usa ka BPAT member kinsa maoy driver sa patrol car nga gi-ambush nga si Ramel Pangcatan.

Kapin kung kulang 500 metros lamang ang gilay-on niini sa detachment sa suspek nga si Lassam.

Human sa maong pagpangambush, nagpatabang ang pulis sa militar nga makahimo og pursuit and clearing operation human masuta ang mga suspek.

Facebook Comments