Agas sa tubig sa mga lugar nga apetakdo sa pipeline repair sa Maa, mibalik na

Davao City – Mibalik na ang agas sa tubig human sa pila ka oras nga water interruption sa mga lugar nga apektado sa gate valve ug transmission line repair sa Bypass Road, Maa ning siyodad kagabii.

Sumala ni DCWD Spokesperson Joanna Duhaylungsod, wa ra makaabot sa gitagal nga oras ug mibalik dayon ang agas sa area sa Maa, Buhangin, Bajada, ug Lanang nga ubos sa Dumoy Water Supply System 1 (WSS 1) human naayo ang leaking sa pipeline kagabii.

Giingon ni Duhaylungsod, nagsugod ang wa’y agas sa tubig bandang 7:00 kagabii ug nahuman ang trabaho 11:00 na kagabii.

Gi-isplikar ni Duhaylungsod nga nakasinati og leak ang pipeline sa Bypass Road Maa, ug daghan kini og rason sa leaking kini hatod sa gidugayon na, o dili ba kaha pag-agi sa dagkong mga truck, ug road construction.

Dunay mga dapit pa nga hangtod karon hinay pa ang presyor sa agas, kini tungod wa pa hingpit maka- rekober ang pipeline gikan sa pag-ayo, busa prayoridad ang mga konsumante sa water augmentation nga gihimuon sa Water District hangtod magkusog na ang agas sulod sa 48 ka oras.

RadyoMaN Joel Viray