Davao City – Nanawagan karon og tabang labi na sa mga nag-unang panginahanglan ang mga nasunogan sa Purok IKP ug San Jose, Brgy Duterte, Davao City nahitabo pasado alas-3 kagahapon sa hapon (Marso 9, 2021).
Sa interbyu sa DXDC RMN Davao kang Almond Guimalan, 23-anyos, residente sa maong lugar ug usa sa nasunogan, gisaysay niini nga gikan kini og trabaho sa dihang nahibal-an niini nga aduna nay sunog sa ilang lugar asa anaa ang iyang inahan ug usa ka igsoon nga dali usab nga nakahawa sa area.
“Pag uli nako, naa pa koy ano na ninaug ko og dagat. Actually taob man gud to sya. So niadto pa ko og dagat kay basin ugaling makasalba pa ko og sinina bahala’g gamay pero pag ano nako dili na gyud nako kaya kay init na kaayo. Actually sila mama nakalakaw sila pero wala gyud ‘mi nakuha maskin sinina,” saysay ni Guimalan.
Matud ni Guimalan, temporary silang gipahimutang sa usa ka gym sa Brgy. Duterte uban ang laing pang fire victims diin karton lamang ang gigamit nilang banig kagabii.
Gibutyag niini anaa na sa 25 ka tuig sila nga nagpuyo sa lugar ug kini ang pinakadakong sunog nga ilang nasinati diin unang higayon nga naapil usab ang ilang pinuy-anan.
Gipanawagan sa nahisgutan ang pagkaon, sinina, banig, ug uban pang nag-unang panginahanglan diin wala silay nasalbar bisan gamayng gamit gawas lang sa ilang gisuot nga sinina.
RadyoMaN Kirby Manzon
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
