Agrarian Reform Beneficiaries Organizations, tumulong ti laban kontra COVID-19

99

iFM Laoag – Paggunayen ti Department of Agrarian Reform (DAR) dagiti mannalon, partikular dagiti kamkameng dagiti agrarian reform beneficiaries organizations wenno ARBOs tapno tumulong iti food sufficiency program ti gobierno ken iti laban kontra ti Novel Coronavirus 19.

Kuna ni DAR Secretary John R. Castriciones, agarup 3,000 dagiti ARBOs nga adda iti aywan ti departamento.


Ti bilang dagiti miembro iti kada ARBO ket saan a nababbaba ngem 50 a mannalon. Kayatna a sawen, agarup 150,000 dagiti mannalon a mabalin a ma-mobilize kontra iti Covid-19.

Inlawlawag ni Secretary Castriciones a dagiti produkto dagitoy a mannalon ket nasisita, saan laeng para iti aginaldaw a konsumo, ngem nangnangruna iti pannakapatibker ti bagi ken immune system dagiti umili.

Tapno maipatungpal daytoy a gagem, mangted ti DAR ti quarantine accreditation pass kadagiti kwalipikado a mannalon ken ARBOs tapno agtultuloy ti panag-supply-da ti nabuslon a taraon kadagiti umili.

Babaen ngarud kenni Atty. Luis Meinrado C. Pangulayan, Undersecretary for Legal Affairs Office ti DAR, napirmaan ti Memorandum Circular No. 5 a nakaipalaunan ti “Guidelines for the Issuance of the DAR Quarantine Accreditation Pass.”



Ti authority ti DAR a mangi-issue dagitoy a quarantine pass ket manipud iti Resolution No. 19, series of 2020, ti Inter-Agency Task Force (IATF).


Libre a maibunong dagitoy a quarantine pass kadagiti mannalon ken addanto pay dagiti DAR personnel a mangasistir kadakuada. Numan pay kasta, mai-require kadagiti mannalon ti panagusar kadagiti personal protective gears.

Inbatad ti DAR secretary a babaen daytoy nga addang maikkan ti taraon dagiti umili kadagiti critically affected areas, masuportaran ti pagsapulan dagiti ARBOs ken mapalag-an dagiti agdama a parikut ti national ken local government. [Detalye manipud ken ni Jorge Guerrero]

– Bernard Ver, RMN News

Facebook Comments