ILOILO City – Liwat ginpahanugotan sang city government ang Liga ng mga Barangay Jaro District nga dumalahan ang Jaro Agro-Industrial and Charity Fair.
Ini paagi sa Executive Order No. 002 S. 2018 nga ginpaggwa ni Mayor Jose Espinosa III gindesignar niya ang Jaro ABC nga dumalahan ang Jaro Agro-Industrial and Charity Fair.
Kaupod sang EO ang paghatag sang poder sa Liga nga magpatindog sang Kiosk, cart mobile, perya kag rides sa bahin sang Rizal street kag magpatuman sang landscaping show sa sulod sang plaza.
Suno kay Espinosa ang ila pagpahanugot nga makabaligya kag magapatindog sang peryahan sa gwa sang plaza resulta sang pagtuon sang committee sa pagpanguna sang Public Safety and Transportation Office (PSTMO).
Samtang sa bahin ni Liga President Punong Barangay Leo Lindero sang Brgy. Our Lady of Lourdes nga siguradugon nila nga indi na masulit ang natabu sang nagligad nga tuig.
Pasalig sini tuhay ang matabu subong bangud nga landscape ang sulod sang plaza samtang ang mga balaligyaan kag perya ara sa gwa sang plaza.
Pahayag ni Lindero nga P4,500 ang bayad sa isa ka kiosk nga magalawig sang isa ka bulan nga magatakop sa Pebrero 8.
Sang nagligad nga tuig nangin kontrobersyal ang Jaro Agro-Industrial and Charity Fair bangud sang isa sang illegal collection sang iban nga tawo kag illegal nga connection sa linya sang kuryente sang syudad.
