Antipolo – Nagkarambola ang siyam na sasakyan sa bahagi ng sumulong highway na sakop ng Barangay Sta. Cruz sa Antipolo, Rizal.
Sangkot sa banggaan ang isang truck, mga van at ilan pang private vehicles.
Sa inisyal na imbestigasyon – una nang nagbanggaan ang isang hilux pick-up at Mitsubishi Adventure.
Nataon naman na binabaybay ng truck na may kargang buhangin ang pababang bahagi ng kalsada nang bumulaga sa kanya ang dalawang sasakyan.
Hindi kumagat ang preno ng truck kaya kumabig ito pakaliwa na tumama naman sa isa pang sasakyan na nagresulta ng pagbangga ng anim pang sasakyan.
Sa lakas ng impact, bumagsak ang isang poste matapos tamaan ng tumagilid na van.
Dalawa ang isinugod sa ospital habang walo ang nagtamo ng minor injuries at nilapatan ng paunang lunas ng mga rumespondeng ambulansya.
Nagdulot naman ng matinding traffic sa lugar ang aksidente.
