Patay ang driver sang elf nga truck kag indi magnubo sa napulo ka mga pasahero sang Ceres ang napilasan sa natabu nga aksidente sa Sitio Garo, Barangay Aldeguer, Sara,Iloilo.
Ginkilala ang napatay nga si Rogie Lozada, 40 anyos sang Barangay Natividad, Pilar, Capiz.
Suno sa nakasaksi sa insidente nga si Ylon Aspera, ginpahayag sini nga nakita gid niya kon paano nagluntad ang aksidente.
Suno sa iya nga una nga nagadalagan ang Ceres padulong sa Estancia kag nagasunod ang tricycle nga ginasundan naman sang elf nga truck.
Subong man, nagbahar ang Ceres agud magpapanaug sang pasahero kabangdanan na-alang-alang ang tricycle rason nga nagtuyo ini nga mag-overtake sa Ceres apang nagbunggo ini sa bus.
Bangud madasig man ang dalagan sang elf, nabungguan man sini ang tricycle kag nag-agaw ini sang lane kon sa diin timing man nga nagapadulong ang isa pa ka Ceres halin sa Estancia kabangdanan nagbunggu-anay ang mga ini.
Bangud sa kabaskog sang impact, nagtiyog ang truck kag nagtabug ang driver nga si Lozada kabangdanan sang kamatayon sini.
Samtang pilason man ang pahinante sang truck lakip na ang driver sang Ceres kag pila ka mga pasahero nga ginpangdala sa ospital.
