Dead on arrival sa Barotac Viejo District hospital ang backrider sang motorsiklo matapos magsuhot sila sa naga-park nga truck sa barangay Camiros, Anilao, Iloilo mga alas 5:30 kaina sang hapon.
Ginkiklala ang napatay nga si Jason Padios, 26 anyos sang Barangay Balabag, Anilao, samtang pilason naman ang driver sang motorsiklo nga si John Dave Buyco, 25 anyos sang banwa sang Lemery, Iloilo.
Base sa imbestigasyon sang Anilao PNP, madasig ang dalagan sang motorsiklo nga ginamaneho ni Buyco sang magsuhot sila sa naga-park nga Isuzu truck nga may karga nga tubo nga ginamaneho ni Jenel Atondukan, 30 anyos sang Poblacion Anilao.
Gilayon nga gindala sa ospital ang duha ka biktima apang wala na matabangan si Padios.
Yara naman sa custody sang Anilao PNP ang driver sang truck kag magapangatubang sang nagakaigo nga kaso.
