Duha ang patay, isa ang malubha nga nasamaran matapos aksidente nga nakabunggo ang motorsiklo nga ila ginasakyan sa isa ka depasahe nga salakyan may mga las 4:30 kaina sang aga sa highway sang Purok Gumamela, Brgy. Calumangan, Bago City.
Suno sa Bago City Police Station, ang depasahero nga jeep nga may rota Pta. Taytay-Central Market ang gina-maneho ni Christopher Pantallon, 32 anyos, pumuluyo sang banwa sang EB Magalona, may 13 ka mga pasahero kag nagadalagan sa ensakto nga lane sa direksyon pakadto sa norte halin sa sur.
Sandig sa blotter ang motorsiklo naman ang naga-dalagan halin sa sur padulong sa norte, may duha ka backrider kag gina-maneho sang wala pa makilala nga driver.
Nabutang man sa blotter nga base sa initial investigation sang Bago CPS ang motorsiklo ang naglapaw sa lane nga amo ang gina-agihan sang depasahe nga jeep gani ini sila ang nakabunggo nga nagresulta sang pagkapatay on the spot sang duha ka rider samtang nag-angkon naman sang seryoso nga kasamaran ang isa pa ka rider.
Ang driver naman sang depasahe kag ang iya pasahero nakaangkon lang sang minor injuries kag ginpangdala sa Bago City Hospital.
[image: image.png]
