Dumalag, Capiz – Lunsay nag-angkon sang kasamaran sa lawas ang 11 tanan ka mga persona matapos naaksidente ang ginasakyan nga passenger van sa national road sang Brgy. Duran, Dumalag, Capiz alas 5:00 kahapon sang hapon.
Ginkilala ang mga biktima nga sanday PO1 Ronel de Santo Tomas, 28 anyos assigned sa Caticlan Airport kag residente sang Brgy. Daa Ili, Cagayan Valley; Margie Tabula y Padilla,33 anyos sang Brgy. Palale, Kalibo, Aklan; Rezelle Barrientos, 25 anyos sang Brgy. Andagaw, Kalibo, Aklan; Gary Lanceta, 37 anyos sang Oton, Iloilo; Sidney John Merced, 28 anyos sang Arevalo, Iloilo City; Ava Lariza, 27 anyos kag Angelo Moral, 53 anyos sang Ajuy, Iloilo; Maybelle Salugao, 36 anyos sang San Miguel, Iloilo, Jelou Pagobo, 33 anyos sang Boracay Island, kag David Jason Calizar, 23 anyos residente sang Taculing, Bacolod City. Pilason man ang driver sang van nga ginkilala kay Nestor Cataluña, 45 anyos sang New Buswang, Kalibo, Aklan.
Base imbestigasyon sang Dumalag PNP, nagikan sa syudad sang Iloilo kag padulong kuntani sa Kalibo, Aklan ang Toyota Hi-Ace Van nga ginamaneho sang nasambit nga driver, apang pag-abot sa nasambit nga lugar, gulpi na lang nga naglupok ang nawala nga goma sa naunahan nga porsyon sang salakyan rason nga nadulaan sang kontrol sa manibela ang driver kag naglumpat ang salakyan sa kilid sang karsada.
Bangud sang nasambit nga insidente, lunsay samaron ang mga pasahero lakip na ang driver sang nasambit nga van. Gindala sa Tapaz District hospital ang pila sa mga biktima agud sa nagakaigo nga pagbulong, apang ang iban nagpamalibad nga magpaospital bangud minor injuries gid lamang ang ila naangkon sa lawas. Samtang yara naman sa kustodiya sang kapulisan ang driver kag ang nasambit nga salakyan.
*(photo from web)*
