AKSIDENTE SA DALAN | Tatlo ka mga motorsiklo, nagbunggu-anay sa banwa sang Pontevedra; anum pilason

Pontevedra, Capiz – Ginpangdangat sa Bailan District Hospital ang anum ka mga persona matapos nagluntad ang aksidente sa dalanon nga ginakadalahigan sang tatlo ka mga motorsiklo sa Barangay Lantangan, Pontevedra, Capiz kahapon sang hapon.
Ginkilala ang mga biktima nga sanday Avelino Valois, Den Paul Valois ,Joven Buenconsejo, Joseph Jawara, Dave Bentillo kag Jake Detanoy. Base sa imbestigasyon sang Pontevedra PNP, nag-overtake ang motorsiklo nga ginamaneho ni Detanoy sa iya ginasundan nga salakyan rasun nga nabungguan sini ang kasugata nga motorsiklo nga ginamaneho naman ni Buenconcejo sakay ang iya mga backriders nga sanday Bentillo kag Jawara.
Bangud sang mabaskog nga impact sang pagkabunggo, nadalahig ang isa pa gid ka motorsiklo nga ginasakyan ni Avelino upod sa iya apo nga si Den Paul.Nag-angkon sang mga gasgas kag kasamaran sa lawas ang mga biktima kag padayon pa nga gibulong sa ospital. Samtang nagapadyon sa gihapon ang imbestigasyon sang mga kapulisan angut sa nasambit nga insidente.
*(Photo from web)*

Facebook Comments