Estancial, Iloilo – Patay ang tatlo ka mga persona matapos ang nagluntad nga pagbungguanay sang tricycle kag motorsiklo sa Barangay Panian, Estancia, Iloilo. Ginkilala ang mga napatay nga sanday Alvin Dela Cruz, 28 anyos, residente sang Batad, Iloilo, driver sang motorsiklo kag ang backrider sini nga ginkilala sa kay Rustom Arostique, 32 anyos sang Barangay Canapian, Maayon, Capiz. Ginbawian man sang kabuhi ang pasahero sang tricycle nga si Marilyn Duran, 56 anyos sang Barangay Marita, President Roxas, Capiz.
Samtang, padayon nga ginabulong sa ospital ang bana ni Duran nga nagamaneho sang tricycle nga si Danilo Duran, 60 anyos matapos mag-angkon sang mga kasamaran sa lawas. Naga-guwa sa inisyal nga imbestigasyon sang mga kapulisan nga nabungguan sang motorsiklo nga ginamaneho ni Dela Cruz ang kasugata nga tricycle nga ginamaneho ni Danilo.
Nahibaluan nga nagpang-agaw sang linya ang motorsiklo nga amo ang gintunaan sang aksidente. Bangud sang tuman ka baskog nga impact sang pagkabunggo, nag-angkon sang patal nga kasamaran sa ulo ang mga biktima nga amo ang gintunaan sang ila nga kamatayon. Nagapadayon pa ang imbestigasyon sang mga otoridad angut sa nagluntad nga aksidente.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
