Jamindan, Capiz- Tuman nga kahadlok ang nabatyagan sang mga pasahero sang isa ka RORO bus matapos nga nadulaan sang kontrol ang driver sini samtang ginasubay ang dalan sa Brgy. Agambulong sa banwa sang Jamindan pasado alas 12 sang tungang udto.
Suno sa impormasyon, halin sa Metro Manila padulong sa Iloilo ang bus liner nga may yara sang bus number nga 623 sang pag-abot sa likuon nga porsyon sang amo nga dalan, wala makontrol sang driver ang manibela rason nga nagsaog pa antes nga nabunggo sa puno sang madre de cacao.
Suno sa mga pasahero, posible nga natagpilokan ang driver bangud nga wala ini sang tulog kag kabulos sa pagmaneho halin sa ila ruta sa Metro Manila.
Masuwerte naman nga wala sang may seryoso nga napilasan sa masobra 50 ka bilog sini nga pasahero maluwas lamang sa reklamo nga mga pagpalanakit sang kalawasan tuga sang pagkabunggo.
Nag-angkon sang gupi kag samad ang prente nga bahin sang amo nga bus.
**(photo: Jolle Mairen Payas)**
