Pagadian City – Napun-an na usab og 7 katawo ang kompermadong nataptan sa Corona Virus Disease ( COVID-19) sa probinsya sa Zamboanga del Sur ug kadaghanan sa mga nadugang pulos residente sa Brgy. Ignacio Garatta, Dinas, Zamboanga del Sur.
Base sa ulahing datos nga gipagawas sa ZamboSur Task Force ug Integrated Provincial Health Office (IPHO) padayong nagsaka ang ihap sa naigo sa Covid-19 sa probinsya ug gani 16 katawo na ang aktibong kaso sa makamatay nga Virus.
Nagpositibo sa maong kagaw ang 24 -anyos nga lalaki, 25-anyos nga babaye ug 17-anyos nga lalaki, nga pulos mga Locally Stranded Individuals (LSIs) parehong mga residente sa Matinabangon, Ignacio Garatta, Dinas, Zamboanga del Sur.
Ang nahisgutan nga mga pasyente susamang gikan sa Pasig City diin nasayran nga pulos nakauban ni Patient number 42 -ang 30 anyos nag LSI nga gikan usab sa Pasig City nga nagpaalim pa karon sa Zamboanga del Sur Medical Center.
Laing taga purok 2, Legarda Uno, Dinas usab ang natakbuyan sa Covid-19, kini ang 25 -anyos nga lalaki, nga gikan sa Paranaque City.
Nagpositibo usab sa maong kagaw ang 35 nga babaye nga taga-Purok Maguindanao, Poblacion, Kumalarang, nga nakauli gikan Pasay City.
Usa ka 10-anyos nga batang lalaki usab ang nagpositibo sa virus nga taga-Dipili, Bayog, ning probinsya nga nakauli niadtong nakalabay nga semana gikan sa Caloocan City.
Samtang usa ka 21 anyos nga lalaking LSI nga taga- Purok 4, New Basak, Dumingag, nga gikan sa Marikina City ang nagpositibo sa Covid-19.
Ang mga bag-ong nadugang sa talaan sa IPHO pulos asymptomatic ug gipapundo na karon sa Isolation Unit sa ilang lungsod .
