Davao City – Nasikop sa kapolisan sa San Pedro ang usa ka tulisan ug usa ka akyat bahay gang member atol sa gilusad nga Oplan R.A.T Tugis natigayon 1:30 sa hapon didto sa Lower Madapo sa Barangay 8-A syudad sa Davao.
Sa report gikan sa San Pedro Pnp naila ang suspek nga mao si Anthony Andolong alyas Tonton, 19 anyos nagpuyo sa nahisgutang lugar samtang ang complainant nga gikawatan sa suspetsado nailang si Kendrick Ato, 32 anyos nagpuyo sa nahisgutang lugar.
Matud pa sa dihang gilusad sa kapolisan ang operasyon kauban ang mga Barangay Opisyal sa pagpanguna ni Brgy kagawad Danilo Apuya naaresto sa otoridad ang suspek nga nangawat sa usa ka unit nga assembled speaker nga mukantidad og 7,000.00 pesos nga gipanag-iyahan ni Ato.
Narekober sa kapolisan ang mga kinawat gikan sa panimalay sa usa ka buyer nga nailang usa ka Danilo Acolentaya sa may Pag-Asa Bankerohan ning siyudad.
Nakuha ang assembled speaker ug laing usa ka unit nga 32 inches Flat Screen TV nga mukantidad og 30,000.00 pesos nga gikawat sa suspek niadtong milabayng bulan sa Hulyo, petsa 30 didto sa panimalay sa usa ka Segmunda Orencia sa maong barangay diin nasayran nga gibaligya lamang sa suspek sa kantidad nga 2,000.00 pesos.
Ang dinakpan nga si Andolong balhug na San Pedro Pnp ug gikatakda nga pasakahan ug kaso karong adlawa.
Samtang ang kapolisan San Pedro Pnp nagpahigayon ug follow-up operation kalabutan sa kaubanan sa suspek nga mao sila alyas Carlo, Abdul, Barok ug Jasper kansa gituohan mga sakop sa Akyat Bahay.
RadyoMaN Don Pulayao
