Gitagaan og panahon sa dxCC-RMN Cagayan de Oro nga makapanawagan og tabang sa katawhan ang usa ka inahan nga dunay anak nga nidako ang ulo tungod sa hydrocephalus.
Ang inahan mao si Lailani Panandigan, 48 anyos, minyo nga taga Pinikitan, Barangay Camaman-an ning syudad.
Dala sa inahan dinhi sa dxCC ang iyang 13 anyos nga anak nga si Najid nga nidako ang ulo tungod sa hydrocephalus.
Gibutyag sa inahan atol sa programang Straight to the Point- Kuskos Batikos ni RadyoMaN Zaldy Ocon nga giignan na siya sa uban nga ihatag nalang sa DSWD ang iyang anak tungod sa kondisyon niini.
Apan mibarog ang inahan sa pag-ingon nga dili niya ihatag sa DSWD ang pag-atiman sa iyang anak tungod kay andam kini sa pag-atiman niini hangtud nga naa pa siyay kinabuhi.
Tungod niini, naghangyo ang inahan sa tanang tigpaminaw nga mahatagan sila og tabang pinansyal aron sila mabuhi ug makapalit og wheel chair alang sa iyang anak.
Nasayran nga duha ka tuig nang bulag sa iyang bana ang maong inahan ug naningkamot na lamang sa pagpamaligya og mga candies, sigarilyo ug junk foods sa kadalanan uban ang iyang anak.
Gidugang sa inahan nga niadtong Sabado lamang naguba ang wheel chair sa iyang anak nga gihatag usab kaniadto sa usa ka empleyado sa Lourdes College nga nalooy usab sa iyang kahimtang nga iya rang gibaba-baba ang iyang anak.
Sa karon, padayon pa ang dxCC-RMN sa pagdawat sa inyong mga hinabang alang sa maong inahan ug anak niini.
