Davao City – Gikalipay ni Davao City Vice Mayor Bernard Al-ag ang pahayag ni Davao City Mayor Inday Sara Duterte Carpio nga mopapili pag-usab pagkamayor sa syudad karong 2019 election.
Sumala ni Al-ag, nalipay siya sa tinguha sa mayor tungod kay ang iyang serbisyo maoy gikinahanglan sa katawhan sa syudad sa Davao human miluwat sa katungdanan si kanhi Vice Mayor Paolo Duterte.
Hinuon giklaro ni Vice Mayor Al-ag nga wala pa siyay plano alang sa 2019 election kung unsa nga posisyon ang iyang daganan. Matud niya sa karon serbisyo una ang iyang giuna isip bag-ong bise alkalde sa dakbayan.
Apan giklaro ni Al-ag nga kung kuhaon siya nga running-mate sa mayor sa piniliay sunod tuig, andam niya kini dawaton.
Kahinumdoman niadtong nakalabay’ng semana gisulti ni Mayor Inday nga subli siyang mopapili sa 2019 election isip mayor sa dakbayan sa Davao.
RadyoMaN Bernard Pantallon
