Davao City- Gipaabot na lamang ni 3rd District Councilor Majority Floor Leader Bernard Al-ag ang opisyal nga oath taking nga pangunahan sa Department of Interior and Local Government alang sa iyang paglingkod isip bag-ong bise mayor sa syudad hulip kang Paolo ‘Pulong’ Duterte.
Kahinumduman, gidawat ni Pangulong Rodrigo Duterte ang resignation sa iyang anak niadtong Biyernes sa hapon human gilambigit sa shabu shipment ug bangi sa anak nga si Isabelle sa social media.
Segun ni Al-ag, ma-opisyal lamang ang iyang paghulip sa puwesto kung makapanumpa na kini atubangan sa DILG apan samtang dili pa kini mahitabo magpabilin una siya nga acting vice mayor.
Katungdanan daw niya ang pagsalo sa gibiyaang puwesto ni Pulong sanglit siya maoy nakakuha sa pinakadako nga boto itandi sa mga numero unong konsehal sa una ug ikaduhang distrito ning syudad.
Nagsugod na og pangandam ang umabotay nga bise alkalde sa tiwasonong mga trabaho sa konseho nga gibilin sa presidential son.
Wala pa kuno sila nagka-istorya ni Mayor Inday Sara Duterte-Carpio sukad gidawat sa ilang amahan ang pagluwat sa katungdanan ni Pulong.
Magdepende na lang daw kuno sa ‘Hugpong sa Tawong Lungsod political party’ kung si kinsa ang pilion aron muhulip sa dapit ni Al-ag ug wala pa’y konsehal nagpakita og interes aron gunitan ang posisyon sa majority floor leader sa konseho.
Gisaad pa sa incoming vice mayor nga iyang timbawason ang mga nasugdan nga mga programa ni Pulong ug ang napulo ka programa ni Mayor Inday Sara nga hinay-hinay na natuman karon.
Walay plano ang bise mayor nga magpatuman og kausaban sa konseho luyo sa ilang naandan nga mga palisiya dihang si Pulong pa ang nangulo sa balay-balauranan sa dakbayan.
Paningkamotan ni Al-ag nga makuha ang respeto sa mga kaubanang konsehal diin wala pa masayod ang outgoing Majority Floor Leader kung iyaha na bang i-career ang pagka-bise mayor sa umaabot nga midterm election sa 2019.
RadyoMaN Joel Viray
