Davao City- Usa gihapon ka luwas nga puy-an ang lugar sa syudad sa Dabaw bisan pa man duna gihapoy mga krimen nga nagapanghitabo.
Kini ang gisulti ni Davao City Councilor Bernard Al-ag atol sa interview sa DXDC RMN Davao diin subay kini sa mga ubay-ubay nga mga komento sa mga netizens sa social media kabahin sa mga nagapanghitabo nga krimen karon nga sumala pa dili na kuno safe ang syudad.
“I think ang Davao City is still very safe, kung tan-awun nato tong report sa DCPO, nag-ubos ang ihap sa mga krimen,” sigun ni Al-ag.
Kahinumduman nga base sa datos nga natala sa Davao City Police office kun DCPO, mikunhod ang crime rate sa syudad sa Dabaw gikan 7,653 ka mga kaso sa bulang Enero kutob Agosto sa tuig 2016, miubos kini ngadto na sa 5,634 kun pag-ubos og 36% sa mga insidente sa nasangpit nga mga bulan karong tuiga.
Dugang ni Al-ag, dili malikayan nga dunay muhimo og kasamok sa syudad sama sa pagpangawat, hold up, riding-in-tandem nga mga krimen ug uban pa apan kinahanglan ang kooperasyon sa katawhang dabawenyo aron malikay sa bisan unsang matang sa kriminalidad.
“So instead nga huna-hunaon nato nga dili safe, I think kinahanglan nato nga mahimong vigilant ta as citizen, magbantay ta sa atong gamit, tan-awun nato ang atoang palibot ug tabangan ang kapulisan nga ma-prevent ang crime ug mga criminal elements sa atoang society,” dugang sigun ni Al-ag.
RadyoMan Renz Barbarona
