Davao City – Gumikan sa kontrobersiya nga gikalambigit karon ni Pnp Chief Oscar Albayalde hatud sa ninja cops issue angayan lamang muluwat sa katungdanan ang opisyal sa ngalan sa delicadeza nga hisgutanan.
Dili man direkta gikonekta sa drug recycling si Albayalde apan tungod kay iyang kanhing mga sakop ang mga ninja cops walay rason aron mupabilin pa kini sa pagka-PNP Chief.
Matud ni Professor Randy Ponteras, bug-at kaayo ang alegasyon ni Baguio City Mayor Magalong kang Albayalde diin sagpa kini sa kampanya kontra droga nga gikasa ni Pangulong Rodrigo Duterte.
Sigun ni Professor Ponteras, ang pagnaog ni Albayalde sa posisyon sa boluntaryo nga kabubut-on maka-tabang kini sa pag-salbar sa imahe sa PNP maingon man sa giyera sa illegal drugs sa administrasyon.
Maka-uuwaw ang gilambigitan karon sa pipila ka sakop sa nasudnong kapulisan nga sila ra diay mismo ang gapangamot sa operasyon imbis nga gisaligan nga maoy musumpo sa suliran sa droga sa nasud.
Hinoon, gi-uyonan ni Professor Ponteras ang pagduda sa PNP Chief sa motibo ni Magalong sa punto nga hawid man sa kanhi opisyal sa CIDG ang pag-recycle sa droga sa kanhi mga sakop ni Albayalde.
Hayan mabutang sa alanganin ang gikatakda nga pagretiro ni Albayalde pipila ka bulan gikan karon hu-man gidilahig ang iyang pangalan sa senate inquiry sa isyu sa ninja cops ug drug recycling.
RadyoMaN Joel Viray
