El alcalde Beng Climaco-Salazar ya pidi con el nuevo instolao District Collector del Bureau of Customs aqui na ciudad Atty Jesus Balmones para pricura minima y eradica el problema de smuggling que ta socede na mga Puerto del ciudad.
Este el pidimiento de Climaco porcausa con el mga mal experiencia del govierno local y otoridad na fueblo que cuantos beses ya de antes ya queda victima del consequencia donde ta larga lang otraves y ta perde algun cosas mga smuggled items que ta fuede confisca el otoridad na fueblo llegar na poder del Customs.
Ya revela el alcalde que siendo rampante el actividades de smuggling aqui na ciudad, deve el Customs dobla tambien diila campanya coneste y mas major si man-deputize el ahensya con el myembros del policia aqui na ciudad para el pelea contra smuggling.
Cuantos beses ya del mga pasao año ya experiencia el policia local ta fuede confisca mga illegal contrabando, sin saver ta larga lang coneste otraves el Customs porcausa con el asunto de jurisdiccion, asegun con Climaco. – *Bhong Simbajon/RMN News*
