Iloilo City – Indi matuod ang alegasyon sang babaye nga Japanese national nga ginkawat sang isa ka tricycle driver ng iya dala nga gamit.
Suno kay Public Safety and Transportation Management Office ukon PSTMO Head Jeck Conlu, ginmanduan sila ni Iloilo City Mayor Jose Espinosa III nga imbestigaran ang nasambit nga reklamo bangud nakataya ang imahen sang syudad .
Sa ginhiwat nga imbestigasyon, may isa ka anggulo nga ginasundan ang PSTMO nga nagapakita nga indi matuod ang alegasyon sang Japanese national nga ginkilala kay Yuryko Sugaki.
Suno kay Conlu, ila ginsundan ang ginhalinan ni Sugaki tubtob nagbiya na ini sa pungsod pinaagi sa mga CCTV footage kag ila nakita nga may dala nga backpack si Sugaki pag-abot niya sa boarding house kag yara man ang mga gadgets nga una na niya gin-alegar nga ginkawat sang isa ka tricycle driver sa bahin sang Lapuz port sang damlag lang.
Sang pabalik na sa Japan si Sugaki, nakita man sa x-ray machine sa airport nga may mga gadget nga yara sa iya bag.
Dugang pa ni Conlu, nagaduda na sadto ang mga kapulisan sang nagreklamo si Sugaki bangud daw kasubong nga indi siya sigurado sa iya pahayag kag nangin kalmado sang makuha ang kopya sang blotter report.
Pagtan-aw sang PSTMO, mahimo luyag sang Japanese national nga i-claim ang iya travel insurance gani iya ginpa-gwa nga ginkawat ang iya mga gamit.
Madumduman nga nagpalab-ot sang reklamo sa kapulisan si Yuryko Sugaki matapos gin-alegar nga ginpalagyo sang tricycle driver ang iya mga gamit sang nagsakay ini sa tricycle malapit sa Lapuz port.
CCTO
