Davao City – Imbestigahan: Kini maoy panawagan karon sa Magdalo Partylist ngadto sa Duterte administration aron mugawas ang kamatooran kung aduna ba’y lig-ong basihan ang alegasyon nga si Lt.Col. Jovie Espinido involved sa illegal drug trade sa nasud.
Matud ni kanhi Magdalo Partylist Representive Gary Alejano, ang gobyerno angay nang mo-utilisar sa halapad nga kagahum ug impluwensiya sa intelligence units ug mga enforcement agencies niini aron sutaon kung apil ba gayod o wala sa industriya sa droga ang ilado apan kontrobersiyal nga police officer kinsa ‘poster boy’ kun nawong sa Philippine drug campaign.
Kahinumdoman nga kapin 300 ka mga pulis gi-alegar nga mga ‘ninja cops’ kalakip si Espinido kinsa iladong ‘druglord-hunter’ sa nasud karon.
Dugang ni Alejano nga bugtong ang imbestigasyon ug makuting balidasyon lamang maoy makahatag og klarong katin-awan sa pagkatawo ni Espinido ilabi na kung tarong ba kini o usa ra gihapon sa mga police scalawags sa nasud.
Kung mugawas nga tinuod ang tanang pasangil batok kang Espinido, dakung sagpa kini kang Duterte ug sa kampanya niini kontra droga.
RadyoMaN Joel Viray
