Davao City – Sa pagsugod og balos sa Iran batok sa Estados Unidos pinaagi sa pagpalupad og mga ballistic missiles punting sa base-militar sa America didto sa Iraq, dili halayo ang posibilidad nga mapagan gayud ang kasikbit nga mga nasud sa Tungang Sidlakan nga maoy pabilo unya aron mo-ulbo na ang gikabalak-an ug gikahadlokan nga ikatulong giyera sa kalibutan kun World War III.
Matud ni kanhi Magdalo Partylist Representative Gary Alejano, delikado ug kumplikado na ang sitwasyon sa Middle East karon tungod kay ang nagbangi mga dagkung nasud adunay kaugalingong mga kaalyados kun allies kinsa hayan madamay sa kasuko ug apilon og tiro sa Islamic nuclear superpower gumikan sa ilang pag-ayuda sa Estados unidos sa pakigbuntog kanila.
Matud ni Alejano, adunay dakung kahigayonan nga manghilabot ug labanan sa Russia ug China ang ilang geostrategic partner nga Iran sa away niini sa US sanglit nagsumikad ang ilang dakung por ciento sa supply sa petrolyo gikan sa Iran.
Sa nagapanghitabo karon, lagmit dili usab makatugot ang ubang mga nasud didto sa Middle East nga kaalyado sa America nga dili makabalos ugaling atakihon sila og apil ug kung mahitabo gayod, hayan masabwag sa kanait nga mga nasud ang kagubot nga maoy senyales sa pagsugod sa ikatulong gubat sa kalibutan, pangagpas pa ni Alejano.
Gumikan niini, dili gayud makalikay ang Pilipinas sa iyang commitment sa pagtabang ug sa pakig-abin sa America diha sa pakig-away sa kalaban nunot sa Mutual Defense Treaty nga maoy nagbugkot sa duha ka mga nasud nga maoy lagmit basehan aron mapugos ang Pilipinas sa pag-entra sa bangi karon.
Dugang ni Alejano, halayo man tuod ang posibilidad nga muabot sa Pilipinas ang ballistic missile sa Iran, ang dakung epekto niining pagbuto sa tensyon mao ang pagkunhod sa supply sa petrolyo ug ang kaugmaon sa mga Overseas Filipino Workers (OFWs) nga nanarbaho sa maong parte sa kalibutan.
Sumala ni Alejano, kung ugaling makasinati og pagkulang sa supply sa petrolyo ang Pilipinas hatud sa epekto sa panagsangka sa America ug Iran, seguradong muhampak ang krisis sa ekonomiya ang nasud ug musaka ang presyo sa mga nag-unang produkto nga klarong magpalisod unya sa mga yanong lungsuranon.
Sugyot sa kanhi Philippine Marine official sa Duterte administration nga mas pakusgon ug palig-onon pa ang kapasidad sa Armed Forces of the Philippines (AFP) aron makadepensa kita por se caso lang nga moabot ang panahon nga damayon kita sa kapungot karon sa Iran pinaagi sa pagpalupad og ballistic missiles punting dinhi sa Pilipinas.
RadyoMan Joel Viray
