Davao City – Nagpabiling alerto ang tanang mga personahe sa kapulisan ingon man mga responders nga nadestino dinhi sa Davao Memorial Park nahimutang sa may MacArthur Highway alang sa pag-obserbar sa ‘Kalag-Kalag.’
Sa interview sa DXDC 621 RMN Davao, gibutyag ni Talomo Police Station Commander Police Chief Inspector Ronald Lao nga padayong nagpatuman og hugot nga seguridad ang PNP inubanan sa Task Force (TF) Davao ug mga NGOs nga adunay kaugalingong tent sa maong sementeryo.
Dugang ni Lao nga gawas sa duha ka checkpoints sa may entrance sa Davao Memorial Park, aduna usay mga pulis nga naga-roving sulod sa maong lubnganan.
Awhag ni Lao niadtong muduaw sa Davao Memorial Park nga likayan ang pagdala og mga bladed weapons, ilimnong makahubog, lighter ug bisan payong nga adunay talinis nga tumoy aron dili malangan sa mga ipahigayong pagrekisa.
Ang Davao Memorial Park gikonsidera nga maoy pinaka dako nga private cemetery dinhi sa dakbayan sa Davao.
RadyoMaN Abi Bibera
