Roxas City, Capiz – Handa na ang Capiz DepEd Division para sa pagbukas sang klase subong nga adlaw sang Lunes para sa mga pampubliko nga boluthuan.
Suno kay DepEd Division Supt Dr Roel Bermejo, all systems go na ang opening sang klase matapos man ang ginpatigayon nga Brigada Eskwela 2019 sang Mayo 20 tubtob 25 kag ginpahamtang nga Oplan Balik Eskwela Operation Center sa tagsa ka mga eskwelahan kun sa diin nagatratar sa mga palamangkutanon ukon queries sang mga ginikanan.
Suno kay Dr Roel Bermejo, hugot nga gina-obserbar base man sa direktiba sang DepEd ang “No Collection Policy” sa mga eskwelahan samtang gina-ekspektar nga maga-eskwela subong nga adlaw ang kapin sa 147 ka libo ka mga estudyante sa Capiz halin sa Kindergarten tubtob sa Grade 12.
Ginpahayag man sini nga may yara sang bastante nga numero sang mga classrooms para sa pagbukas sang klase subong nga adlaw.
Iya man nga ginpasalamatan ang tanan nga membro sang komunidad ilabi na ang mga ginikanan sa padayon nga suporta pinaage sa pagpadala sang ila mga kabataan padulong sa eskwelahan.
