Davao City – Padayong ginasuta karon sa Police Regional Office kun PRO XI ang mga mikalat nga storya bahin sa alegasyong adunay mga nagpakamatay ingon man namatay gumikan sa stress nga dala sa pagsirado sa mga investment schemes sa rehiyon XI.
Sa AFP-PNP presser, gibatbat ni Police Major Jason Baria, PRO XI spokesperson nga adunay impormasyong nadungog ang kapulisan kalabotan sa maong gihisgutan ug makig-koordinar sila karon sa ilang investigative team alang sa pagkumpirma sa alegasyong mga insidente.
“Will look into that sa investigation, kukuha ako ng information doon (Regional Investigation and Detective Management Division o R7),” segun ni Baria.
Kahinumduman nga gikakurat sa publiko ang mga posts sa social media ingon man mga impormasyong nadawat dinhi sa sibyahanan nga adunay giingong mga nagpakamatay ug giatake sa kasing-kasing sa kahadlok ug kabalaka matud pa nga di na makuha ang kwarta nga gi-invest apan wala kini kumpirmasyon gikan sa otoridad.
Subay niini, pahinumdom sa otoridad ngadto sa publiko nga dili usab magpakalat og mga di kumpirmadong impormasyon gumikan dili kini makatabang sa ginabati sama sa kabalaka ug kahadlok sa mga miyembro sa nagdakaiyang investment schemes sa Davao region.
RadyoMaN Renz Barbarona
