Davao City – Nagtoo ang armadong kusog sa nasud nga muagi sa konsultasyon uban sa nasudnong kapulisan ang planong subling pagbanhaw sa Alsa Masa.
Mao kini ang panglantaw karon ni 10th ID Spokesperson Capt. Jerry Lamosao nga muagi sa hustong proseso ang pag-aktibo pag-usab sa gikaintapang grupo kontra kumunista niadtong dekada 80 nga mao ang Alsa Masa.
Nahimugso ang Alsa Masa sa Gotamco Agdao aron kontrahon ug palayason sa dakbayan ang CPP-NPA-NDFP gumikan sa ilang abuso ngadto sa kanhing mga masa nga nakigbatok na kanila.
Segun ni Lamosao, hayan daku og ikatabang ang Alsa Masa sa mga awtoridad sa pagbantay sa seguridad sa kabarangayan gikan sa hulga sa terorismo ug pagpangilkil sa rebeldeng hut-ong.
Matud ni Lamosao, sayo pa kaayo aron mubati og kabalaka ang mga kritiko sa subling pag-organisa sa Alsa Masa nunot usab sa presensiya sa communist organization sa pipila ka barangay sa siyudad.
Gipaniguro usab sa tigpamaba sa kasundaluhan sa rehiyon nga suportado nila ang bisan unsang lakang sa kapulisan sama sa pagbanhaw pag-usab sa Alsa Masa hilabi na kung ang hisgutanan mao ang safety o seguridad sa katawhan.
RadyoMaN Joel Viray
