Margosatubig, Zamboanga del Sur – Naka-ikyas gikan sa kustodiya sa kapulisan ang 36 anyos nga lalaki nga nasikop sa gilusad nga drug buy bust operation sa lungsod sa Margosatubig niining probinsya sa Zamboanga del Sur.
Padayong gipangita sa kapulisan ang naka-eskapo nga si Abdulsalam Mangogaya alyas “Duterte” residente sa sitio Luguimit, Poblacion, Margosatubig.
Gialarma na usab ang kapulisan sa silangan nga kalungsuran sama sa Alicia ug Malangas sakop sa probinsya sa Zamboanga Sibugay nga posibling maoy paingnan sa suspek.
Si alyas Duterte nag-atubang sa kasong paglapas sa Akta Republika 9165 o Comprehensive Dangerous Drugs Act of 2002.
Sa imbestigasyon nasayran nga nakasibat gikan sa Lock-up cell ang suspek pinaagi sa pag-gabas sa rehas sa luyong bahin sa bilanggoan.
Mahinumduman nga nasikop ang suspek sa gikasa drug buy bust operation sa tropa sa Philippine Drug Enforcement Agency (PDEA), Provincial Intelligence Battalion sa Zamboanga del Sur Police Provincial Office, Provincial Drugs Enforcement Unit ug tropa sa kapulisan sa Margosatubig.
Nakuhaan si Alyas Duterte og shabu nga mikabat siyam ka pakite nga kinatibuk-ang mobalor sa P3,400.
