Salug, ZDN- Hangtod karon wala pa’y matudlo nga suspetsado sa nahitabong pagpanigbas ug pagpangdunggab nahitabo didto sa may Brgy. Canawan, Salug, ZDN, niadtong kadlawon sa byernes Agosto 24, 2018.
Walay kaluoy nga gipamatay ang biktima nga sila si Nora Derama, kinsa usa kini ka inahan ug si Justine Derama 8 anyos, didto kini sila nakit-an sulod sa ilang panimalay, samtang ang bana ni Nora nga si Paquito Derama didto kini nakit-an sa ilang tugkaran dili ra usab layo sa iyang asawa ug anak.
Sa inisyal niini nga pag imbistiga sa PNP salug, gibutyag sa inahan sa mga biktima nga si Alonia Moncano, natingala matod pa siya nga udto nalang ang balay sa iyang anak sirado paman gihapon, mao nga naka desisyon siya nga iyang ablihan, ug didto dako niyang ka kurat nga misugat sa iyang panan-aw ang walay kinabuhi niya nga anak nga si Nora u gang apo niini nga si Justine.
Sa gihimong pakighinabi ning inyong tigbalita ngadto kang PO2 Joeremy Tabacolde ang imbitigador sa maong insidente, gibutyag niya nga hangtod karon blangko pa sila kun unsay hinungdan sa paghunos sa kinabuhi sa mga biktima, apan iyang gisugilon nga kini si Paquito Derama, panahon nga mahubog, magsige matod pa ug panghasi ug manghagit.
Nasayran usab nga hubog niadtong higayona ang biktima sa dihang nahitabo ang insidente ug kini karon ang gitutukan sa PNP Salug kun si kinsa ang ulahing kauban niini nga kainom, aron sa ingon makuhaan ug pamahayag para sa posibleng pag ila sa mga suspetsado aron taralon ngadto sa hukmanan.
