Dapitan City – Samaron ang usa ka amahan human giunay og luba sa kaugalingong anak samtang sila nangahubog nahitabo didtong dapita sa may Sitio Makpas, Barangay Ilaya, dakbayan sa Dapitan.
Gidali sa pagdala sa balay tambalanan ang biktima nga si Wilfredo Apul, 57 anyos, kinsa nakahiagom ug samad sa tiyan dihang gidunggab sa kaugalingon anak nga si Dionisio Apul, 34 anyos ulitawo parehong residente sa Barangay Ilaya, Dapitan City.
Sigun sa imbistigasyon sa PNP Dapitan nga bandang alas 5:30 sa hapon ang duruha nag-atubang ug inum atol sa birthday celebration sa ilang paryente.
Dihang nalango sa illimnong makahubog nakalalis ang amahan ug anak resulta sa ilang sinokmagay.
Sumala pa nga wa makapugong ang anak sa kasuko hinungdan nga milanit ug kutsilyo ug gihansakan ang tiyan sa amahan.
Ang nasamdang amahan nadala ug kasamtangan admit sa Zamboanga del Norte Medical Center diin padayon pa’ng giobserbahan ang kahimtang.
Ang anak nga suspek ang nakasibat human sa krimen kinsa target pa karon sa pursuit operation sa kapolisan.
