Davao City – Samdan sa dughan ang usa ka amahan human giluba sa gikaaway sa iyang anak nga wala muhatag sa amotay sa inom nga nahitabo sa Leon Garcia, Agdao ning siyudad alas-11:50 sa gabii.
Nagpabilin gi-obserbahan sulod sa Southern Philippines Medical Center (SPMC) ang biktima nga si Johnny Roxas, 41 anyos, residente sa mao nga dapit, human giduslak sa dughan gamit ang wala matino nga mahait nga hinagiban.
Nasayran nga nagdagan paingon sa balay ang anak sa biktima kinsa nakaangkon og samad ug bun-og sa lawas human giluba ug gikulata sa kainom nga suspek.
Gidepensahan sa biktima ang iyang anak gikan sa suspek nga migukod busa giapil siya og luba sa suspek.
Nasuko matud pa ang suspek ngadto sa anak sa biktima nga gipanukutan kini sa amot sa ilang inum nga maoy tinubdan sa panghitabo.
Hinoon, nadakpan ra usab ug nagtingkagol na karon sa kapulisan sa Presinto Uno ang mamumuno samtang ang mag-amahan padayon pa nagpaalim sa ilang mga samad sulod sa SPMC.
RadyoMaN Joel Viray
