Sa interbyu sa DXDC RMN Davao kang Princess Trisha, 16 anyos, kinamagulangang anak sa magtiayon, emosyunal kining misaysay nga wala nasulod sa iyang hunahuna nga mabuhat sa iyahang mismong amahan ang krimen.
Nasayrang bulag na ang magtiayon apan sa dihang nakauli ang ilang inahan gikan sa abroad aron magbakasyon, mihangyo ang ilang amahan nga magpauban sa ilahang mama sa pagproseso sa PhilHealth niini sa Tagum City, Davao del Norte.
“Mo-surrender na lang siya. Wala gyod siyay konsensya bisan gamay lang? Imbes makonsensya siya iya pa gyod mi niyang hadlokon. Demonyo gyod to siya. Nisalig (‘mi). Mituo kaayo ‘mi ni papa ba. Imbes tarong kaayo iyang pananghid sa amoa unya iyaha ra diayng patyon (si mama). Bisan gamay wala gyud sya nakonsensya unya muingon pa sya nga iyaha ‘ming panguhaon,” saysay sa anak.
Dugang sa anak niini nga aduna pay higayon nga gipangdala silang tulo ka mag-igsoon sa lugar sa ilahang amahan sa Capiz diin didto nakasinati usab sila og physical abuse sa ilahang mismong amahan.
“Gikulata mi niya didto sa iyang poder tapos iyaha ra ming biyaan. Tapos magsugal ra na siya unya biyaan ra mi niya sa balay tapos wala mi bugas, wala mi makaon. Iresponsable gyud (nga pagka amahan) kay babae ming tulo tapos among balay wala pa ‘to nahuman. Wala pa toy tarong nga lock,” matud niini.
Nanawagan usab ang anak ug mga igsoon sa biktimang OFW ngadto sa kapulisan nga mapadali ang pagsikop sa suspek aron kini mapanubag sa iyang gibuhat ug makab-ot sa pamilya ang ilang singgit nga hustisya.
Sa pagkakaron, anaa sa igsoon sa OFW ang tulo ka mga anak niini nga pulos babaye kung asa usab sila gibilin sa dihang nanrabaho kini gawas sa nasud.
RadyoMaN Kirby Manzon
