Davao City – Padayong naglaum ang pamilya sa Dabawenya boxer nga si Nesthy Petecio nga mauli sa anak ang bulawanang medalya para sa Pilipinas human niini napildi si Irma Testa sa Italy sa Women’s Featherweight (54-57kg) sa 2020 Tokyo Olympics.
Sa interbyu sa DXDC RMN Davao kang Teodoro Petecio, amahan ni Nesthy, gisaysay niini nga grabe ang iyang kalipay sa kadaugan sa anak ug nagpasalamat kini sa suporta sa mga Pilipino labi na ang mga Dabawenyo sa dula ni Nesthy.
Matud niini nga nakulbaan siya human nga dapig ang iskor sa Italy sa unang round sa dula apan mibilib kini sa coaches ni Nesthy ug pagpaningkamot sa anak diin napildi niini si Testa sa iskor nga 4-1 via split decision.
“Lipay kaayo ko, sir. Sobra-sobra ang akong kalipay. Sobra-sobra sad ang akong kalipay gyud kay daghan kaayo nag-support sa akong anak sa pag-ampo ba. Saludo ko sa iyang mga coach, bright, sir,” saysay sa amahan.
Himuon ang Women’s Featherweight Finals ugmang adlawa (Agosto 3, 2021) ug makigharong ang Dabawenyang boxer batok kang Sena Irie sa Japan.
Kahinumduman nga gipildi na ni Petecio si Irie niadtong 2019 AIBA Women’s World Boxing Championship sa ilang panagtigi.
RadyoMaN Kirby Manzon
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
