Davao City – Hugot gihimakak sa suspek nga iyang gisunog ang tres anyos
niyang anak nga babaye.
Atol sa interview sa programang Unang Radyo Unang Balita sa DXDC RMN Davao,
gilimod sa suspek nga si Randy, 44 anyos, ug nagpuyo sa Malagamot, Panacan
ang pasangil sa iyang kapuyo-puyo nga iyang gidabdaban ang ilang bugtong
anak nga si alyas Inday
Gipangulipas ni Randy ang akusasyon sanglit aksidente ang nahitabo sa iyang
anak.
Nagtoo ang suspek nga nakab-ot sa iyang anak ang lampara ug nasablig sa
lawas sa bata ang gas resulta sa pagdilaab sa kalayo sa lawas sa biktima.
Giangkon ni Randy nga naka-inom kini ug nakahinanok sa pagkatulog rason
wala mabantayi ang biktima nga nasunog na diay.
Gimahay sa amahan nga suspek ang iyang kapuyo sa nadangatan sa ilang
bugtong anak apan migula sa imbestigasyon sa Sasa PNP nga gituyo pagdaob sa
suspek ang biktima pinaagi sa pagbubo og gas sa lawas ug dayon giduglitan
sa lighter.
Sa wala pa nahitabo ang krimen, nakig-inom pa ang suspek alas 8:00 sa gabii
ug alas 12:00 sa tungang kagabhion mipa-uli ang suspek sa ilang balay ug
didto na nahitabo ang pagdabdab sa anak.
Ang testigo nga si Leonardo, nagbutyag nga nabati niini ang pagsiyagit ni
Inday ug mao na lamang iyang nakita nga nagsilaab ang kalayo sa lawas sa
bata.
Daling gibubuan og tubig ang lawas ni Inday ug dayon gidala sa medic team
sa central 911 sa SPMC apan comatose na ug namatay ra sab si Inday pipila
ka oras sa pagtambal kaniya sa ospital gumikan sa grabe nga sunog sa lawas
niini.
Si Police Chief Inspector Emerson Pugong, hepe sa Sasa PNP nga nakasinati
matud pa og depression ang suspek human siya bulagi sa iyang kapuyo duha na
ka tuig nakalabay nunot matud pa sa kadagmalan ug katapulan niini.
Pugsanon gikuha ni Randy ang bata gikan sa poder sa inahan didto sa
Sarangani ug gidala pagbalik sa ilang pinuy-anan sa Malagamot Panacan.
Giingon ang bata maoy napahungan sa kasuko sa suspek human siya bulagi sa
iyang kapuyo.
Narekober sa crime ang container nga dunay gas ug lighter diin positibo
usab siya gitudlo sa testigo nga maoy nagsunog sa biktima.
Kasuko ang gibati karon sa inahan sa bata ngadto kang Randy diin buot niini
nga madugta sa presohan ang suspek aron mahatagan og hustisya ang kamatayon
sa iyang anak.
Dugang ni Pugong, kasong parricide ang isang-at nga kaso batok sa suspek
kinsa nabalhog na karon sa selda sa Sasa PNP human madakpi sa mga otoridad.
RadyoMaN Joel Viray
