Amahan sa nipanaw nga college student wala gidawat ang pasaylo ug di i-atras ang kaso batok sa drayber

Davao City- Gibarugan sa amahan nga dili nila iatras ang kaso batok sa nakabangga nga drayber ilabina nga namatay ang 2nd year college student human sa pila ka adlaw nga na-comatose ug gideklara kining brain dead sa mga doktor sa Southern Philippines Medical Center (SPMC).

Sa eksklusibong interbyu sa DXDC Team, matud sa padre de pamilya kinahanglang atubangon sa suspek ang kaso ug bayaran niini sa prisuhan ang pagkamatay sa iyahang anak pati na ang nahanaw niining nga mga pangandoy.

Gibutyag sa amahan nga dili pa siya andam makapasaylo ug wala nila gidawat ang tabang nga kwarta gikan sa kampo sa drayber.

Segun ni Police Captain Noe Macolbacol Jr., Deputy Station Commander sa Los Amigos Police Station sa pagkamatay sa estudyante kasong reckless imprudence resulting to homicide na ang kaso batok sa nakaligis nga drayber nga si Joel Gamas Confessor.

“Mam, desidido man gyud ang family sa victim na ipursue ang ilahang complaint sa court, through our investigator, mag submit sila ug death certificate sa victim pra ma elevate ang resolution into reckless imprudence resulting to homicide,” matud niini.

Niadtong Nobyembre 7, 2023, gi-release sa kapulisan ang drayber human kini nakapyansa sa piskalya og P3,000 alang sa provisional liberty.

Ang biktima nga padulong mueskwela nabanggaan niadtong Nobyembre 6,2023 pasado alas-9 sa buntag samtang nitabok kini sa pedestrian lane sa Km 20 Crossing 20, Brgy Los Amigos, Tugbok Dist., Davao City.

RadyoMaN Aimee Guinita