Amahan sa upat ka mga bata nga nasunog sa Mahayag, gipriso

33

Mahayag, Zamboanga del Sur – Selda ang nahimutangan og wala na makasud-ong pa ang usa ka amahan sa haya sa iyang upat ka mga anak nga nakabsan sa ilang mga kinabuhi human mangasunog. Kini human nga gibutang sa rehas sa Mahayag Municipal Police Station ang amahan nga si Gil A. Colanggo, hamtong ang panuigon usa ka contructions worker ug molupyo sa Purok Bayanihan, Barangay Lower Salogdako, Lungsod sa Mahayag, probensiya sa Zamboanga del Sur.
Sa exklusibong pakighinabi sa RMN-DXPR Pagadian News Team ngadto sa apohan sa mga bata nga si Regina Borromeo nga mipasang-at og reklamo mao ang buhatan sa Municipal Social Welfare Development Office (MSWDO) sa lungsod sa Mahayag. Saysay sa apohan nga anaa na karon gihaya sa ilang panimalay ang patay’ng lawas nilang Gian Niez 9 anyos, Njay Niez 8 anyos, Anthony Niez 7 anyos ug si Christian Niez Colanggo 4 anyos human nga masunog ang ilang panimalay alas 10:05 sa gabii niadtong petsa 21 ning bulan sa Enero 2021.
Wala makagawas sa ilang gikatulgan ang mga biktima dihang miulbo ang kalayo human nga migamit sila matud pa og kandila dihang nawala ang suplay sa suga tungod sa pagkaguba sa linya sa NGCP, patay na ang mga biktima dihang nakaabot ang amahan nga gikan diay nag vigil sa ilang silingan nga namatay usab niadtong tunga. Si Gil nahinabi sa DXPR samtang anaa sulod sa selda, siya nagbutyag nga sangko sa langit ang iyang pagmahay sa nahitabo sa ilang pamilya human nga iyang gibiaan ang iyang upat ka mga anak samtang nangatulog, asoy pa niya nga wala niya damha nga mogamit og kandila diay ang iyang mga anak tungod sa iyang pagbiya aron mopadulong sa vigil, wala paman mapalong ang suga niadtong tunga.
Alang kang Gil amahan sa mga biktima nga unta mapasaylo siya sa iyang asawa nga si Niez ng atua sa Kuwait nanarbaho alang-alang unta sa iyang upat ka mga anak nga gibilin sa iyang live-in partner nga si Gil Colanggo, si Gil nagbutyag sa DXPR News Team nga walay kamatooran nga iyang gipasagdahan ang iyang mga anak tungod nangita matud pa siya og panginabuhian tungod binulan lang kung magpadala ang iyang live-in partner ngadto sa ilaha. Gihimakak usab sa amahan nga permi niyang ginapasakitan ang iyang mga anak tungod alang niya desiplina lang ang iyang ginahimo ngadto sa iyang mga anak, dugang pa nga kung unsa man ang mamahimong desiyon sa kaparentihan sa iyang live-in nga siya pagakasohan iya kining pagadawaton apan sakit alang kaniya nga dili niya masud-ong ang haya sa iyang upat ka mga anak.

Facebook Comments