Amay nga missing, napriso gali bangod sa pagshoplift sang duha ka lata sang corned beef balor P104

BACOLOD CITY – Naka detain gali sa Police Station 4 ang isa ka amay nga damlag pa ginreport sang iya mga kabataan nga missing humalin sadtong Lunes, December 3 nga suno sa iya bata gin pick up sang ginaalegar mga pulis.

Si Lino Gamboa, 59 anyos sang Purok Cordova, Brgy 18, Bacolod City ang yara karon sa custodial facility sang Police Station 4 bangud ini ang ginpasakaan sang kaso nga shoplifting sang isa ka grocery store sa dalan Burgos, ciudad sang Bacolod.

Sa interview sang DYHB kay Tatay Lino, ginsiling sini nga sadtong December 3, ini siya ang ginpadakup sang security guard sang isa ka grocery store sa Burgos Street bangud ini ang nagbitbit sang duha ka lata sang corned beef nga nagabalor sang P104 pesos nga wala nabayaran.


Gin-ako ni Gamboa nga nadala gid man niya ang amo nga corned beef nga iya ginsulod sa iya bulsa apang nalipat siya nga bayaran sang hana sya nga maguwa.

Pahayag pa sang amo nga lalaki nga bayaran man niya kuntani ang kantidad sang corned beef apang wala ini ginbaton sang tagdumalahan tig-aylo ini siya ang ginpa-pulis kag gilayon nga gin-inquest ang kaso.

Madumduman nga ang anak ni Lino nga si Leilani Francisco, 39 anyos sang Brgy. Granada ang nagparecord sa Police Station 2 nga ang ila amay ang gin pick up sang wala makilala nga tawo sa atubang sang Corazon Locsin Montelibano Memorial Regional Hospital kag wala na nakabalik matapos ini.

Nagpa blotter ang pamilya ni Gamboa bangud sa pagkabalaka nga may malain nga natabo sa iya apang wala sila naglaum nga makarsel bangod sa corned beef. /dyHB BACOLOD

Facebook Comments