Patay ang duha ka mga mag-uuma human sila gipamusil sa grupo samga armadong lalaki, alas-8:00 sa gabii niadtong nakalabay’ng adlaw, Domingo, didto sa may barangay Notong, Pualas, Lanao del Sur.
Naila ang mga biktima nga sila si Jabber SaripadaTanog, 37 anyos, ug Ayno Abdul Saripada, 31, kinsa gilayog namatay sa maong pagpamanhig.
Naka- ikyas sa maong pagpangambush ang usa ka kauban nila ni Tanog ug Saripada, kinsa nagpatabang na karon sa mga utoridad nga mapanalipdan siya.
Sa report sa Pualas Municipal Police Station, kabanay sa mga biktima ang mga suspek kinsa walay bisan usa nga nasikop human kini misibat ngadto sa wala na masutang direksiyon.
Rido ug pulitika ang gitan-aw nga motibo sa maong pagpamusil.
Ang biktimang si Tanog kanhi konsehal sa barangay kinsa mi-file og certificate of candidacy aron unta modagan sa pagka-kapitan sa barangay.
Tungod niini, gimandoan ni Lanao del Sur Provincial Director Senior Superintendent Ronald Briones ang mga hepe sa mga municipal police stations sa probinsiya nga istoryahon ang mga residente sa ilang matag area of responsibility.
Miingon si Briones nga kinahanglang istoryahon usab nila ang mgaopisyal sa barangay ug mgamokandidato sa umaabot nga eleksiyon, nga i-turn over ang ilang mga armas, labina kung dili kini lisensiyado, aron malikayan ang mosunod pa’ng mga susamang duguong panghitabo. (Divina M . Suson)
