Davao City – Gibasol karon sa Alliance for Nationalism and Democracy (ANAD) ang gobyernong Duterte sa kahadlok nga gibati sa katawhang Pilipino kalabot sa presensiya sa mga Chinese nationals nga ania dinhi sa nasud karon.
Matud sa ANAD, walay laing masumbalikan sa mga kabalaka nga gihambin karon sa publiko sa presensiya sa mga Chinese nationals kon dili ang kagamhanan ra usab tungod sa kadugay sa pagdeklara og travel ban batok sa China.
Sumala ni ANAD spokesperson Arthur Tariman, langay kaayo ang aksyon sa administrasyon sa pagsanta sa pagsulod sa 2019 novel coronavirus sa nasud diin una pa man nagpatuman og travel ban, aduna na’y namatay nga Tsino gumikan sa maong balatian.
Segun ni Tariman, nagresulta sa pag-panic sa katawhan ang ka-walay ensigidang lakang sa gobyerno kontra sa mga Chinese nationals ug unta wala nakasulod ang 2019 ncov sa nasud nga nagpaalarma sa kadaghanan karon.
Kung buot hunahunaon, ulahi na kaaayo ang kamandoan ni Pres. Rodrigo Duterte ug ang rekomendasyon sa Department of Health nga travel ban ilabi na karon nga nakatala na ang Pilipinas og ‘second case’ sa ncov gawas nga duna pa’y gi-monitor nga uban pang ‘Person under Investigation nga mga Chinese nationals.
Sanglit wala naman kapunggi ang pagsulod sa mga Chinese nationals, mas maayong buhaton sa nasudnong gobyerno mao nga kontrolon ang mga botika sa pagpamaligya og face mask aron dili sila makatago og stocks ug makabaligya sa taas kaayo nga presyo aron sila mo-ginansya.
RadyoMan Joel Viray
