Nagtingkagol na sa provincial jail sa Tubod, Lanao del Norte ang 55 anyos nga anak, kauban ang iyang live-in partner, tungod sa pagpangulata sa 88 anyos nga inahan nga giingong adunay dementia o gi-ango-ango na didto sa Barangay Libertad sa Lungsod sa Kauswagan, Lanao del Norte.
Naila ang anak nga si Romeo Asuelo samtang ang iyang kapuyo mao si Luz Escoto, 51, ig-agaw ra usab og tagsa.
Ang inahan naila nga si Ignacia Asuelo.
Matud pa ni Police Captain Eric Logronio, hepe sa Kauswagan Municipal Police Station nga wala na maka-agwanta ang silingan sa pagmaltrato sa magtiayon ngadto sa tiguwang.
Bisan unsa lang ang ilang magunitan nga ibunal ngadto sa senior citizen tungod sa kalagot nga mibalik kini, matud pa, sa pagka-walay bu-ot ug bisan asa lang mopagawas sa iyang hugaw.
Katapusang nakit-an sa silingan nga gibunalan kini og kabo hinungdan nga misumbong na kini sa pulis.
Mga samad ug bun-og sa nagkalain-laing bahin sa lawas ang nakit-an sa kapulisan ug sa mikuha niini nga mga sakop sa Municipal Social Welfare and Development Office (MSWDO).
Sa imbestigasyon, nasayran nga ang 50 mil pesos nga madawat sa tiguwang sa insurance sa kooperatiba ang hinungdan nga gipasakitan kini sa duha ug gusto na nila kining mamatay.
Kasong parricide ang gi-atubang sa duha nga adunay piyansa nga tag 120 mil pesos ang matag usa.
Ang pag-umangkon sa tiguwang nga maoy nag-atiman niini karon ang complainant sa maong kaso. (Divina M. Suson, Kauswagan, LDN, May 8)
