Dumingag, Zamboanga del Sur – Kritikal ang kahimtang sa 9 anyos nga batang lalaki human kining giunay pagluba sa iyang amahan alas 2:00 sa kadlawon dihang dapita sa Purok 2, Brgy. San Vicente, Dumingag, Zamboanga del Sur.
Ang biktima giila nga si Jovert Senarillos samtang ang amahan mao si Roberto Senarillos.
Ang imbestigador sa Dumingag Municiapal Police Station nagkanayon nga nakabaton og samad dinunggaban ang biktima sa iyang tiyan.
Sa wala pa nahitabo ang krimen, natulog lamang ang biktima tapad sa iyang inahan nga si Joan Senarillos apan natingala nalang ang inahan sa bata nga nag-agulo na ang menor de edad og maoy iyang namat-an nga naligo na sa iyang kaugalingon nga dugo samtang ang iyang bana nagluhod atubangan sa bata nga naghupot sa kutsilyo.
Gumikan sa kakuyaw dali nga nibakod si Joan og gi-ilog ang kutsilyo nga gigunitan sa suspek dungan ang pagsingit og pakitabang.
Ang suspek nakaangkon usab og daghanang samad nilubaan sa kuto-kuto nga karon nag-paalim sa balay tambalanan.
Gisuta pa sa kapulisan unsa ang hinungdan sa maong pagpangluba.
