Davao City – Kasong parricide ang atubangon sa usa ka anak tungod sa pagpatay sa iyang kaugalingong amahan sa Sitio Panaga, Barangay Colasas, Paquibato District, Davao City bag-ohay lamang.
Sa interbyu sa DXDC RMN Davao kang Police Officer nga si Luther Napoles sa Paquibato PNP, giila niini ang gipatay nga amahan nga si Freddie Lumantad, 55-anyos, samtang suspek sa krimen ang anak niining si Joseph Lumantad, 26-ayos, susamang residente sa lugar.
Gibutyag ni Napoles nga kanunay na sumala pang naga away ang mag-amahan labi na sa hisgutanan sa abot sa ilang uma.
“Pirminti na sila mag-away bahin sa halin sa uma nila. Mao to gikan sila nag-inom. Pag-uli naglalis sila hangtud nga nagka-initay,” saysay ni Napoles.
Nagbinaharay na sumala pa ang duha diin sa dihang miingon sumala pa ang amahan nga patyon ang iyang anak pinaagi sa sundang, gi-unhan na kini sa iyang anak pinaagi sa pagpusil gamit ang surit-surit ug gitiwasan pa kini sa pagtigbas rason sa kamatayon sa biktima.
Boluntaryo usab nga mitahan sa otoridad ang suspek. Sa pagkakaron, padayon pang gipalawman sa kapulisan ang nahisgutang insidente.
RadyoMaN Kirby Manzon
